Сёння, 22 чэрвеня, у Жодзіна каля помніка ў гонар савецкай маці-патрыёткі Насцесі Фамінічны Купрыяновай прайшоў мітынг-рэквіем, прысвечаны Дню агульнанароднай памяці ахвяр Вялікай Айчыннай вайны і генацыду беларускага народа.
22 чэрвеня 1941 года пачалася Вялікая Айчынная вайна. Праз 85 гадоў жыхары горада, прадстаўнікі працоўных калектываў, грамадскіх арганізацый і пачэсныя госці сабраліся каля помніка Насцесі Купрыяновай, каб ушанаваць памяць загінулых і аддаць даніну павагі пакаленню пераможцаў.
У час мітынгу гучалі словы пра подзвіг беларускага народа, які першым прыняў на сябе ўдар ворага. Удзельнікі ўспаміналі мільёны ахвяр вайны, герояў-франтавікоў і тых, хто цаною ўласнага жыцця адстаяў свабоду і незалежнасць Радзімы.
Помнік, які стаў сімвалам мацярынскага подзвігу
Асобныя словы былі прысвечаны сям’і Купрыяновых. Герой Савецкага Саюза Пётр Купрыянаў і яго браты ўвекавечаны ў бронзе каля знакамітага помніка, а іх маці Насця Фамінічна стала сімвалам мацярынскай мужнасці, стойкасці і самаадданасці ўсіх жанчын, якія не дачакаліся сваіх сыноў з фронту.
У мітынгу прыняў удзел старшыня Мінскага абласнога выканаўчага камітэта Аляксей Кушнарэнка.
Пасля хвіліны маўчання ўдзельнікі мерапрыемства ўсклалі кветкі да помніка, аддаючы даніну памяці героям, якія загінулі ў гады Вялікай Айчыннай вайны.
Карта сайта