Гул рухавікоў камбайнаў і зваблівы пах збажыны пануюць гэтымі днямі на палетках гаспадарак. З добрым настроем перасягнулі ў панядзелак экватар уборкі зерневых у ААТ “Запольскае”.
– Ураджай вырасцілі неблагі, – распавёў дырэктар гаспадаркі Сяргей Александровіч. – Трыцікале і ячмень далі па 32 цэнтнеры збожжа з гектара, жыта – 25. Азімая пшаніца пакуль не такая ўраджайная, але яе яшчэ ўбіраць больш паловы…
Ва ўнутрыгаспадарчым спаборніцтве на жніве амаль упоравень ідуць наперадзе камбайнавыя экіпажы Аляксея Лухверчыка і Сяргея Кудлянкова, братоў Дзмітрыя і Сяргея Шчатко, а таксама Генадзь Лухверчык, які працуе на камбайне адзін. Менавіта яны летась адначасова дасягнулі тысячных намалотаў збожжа. Праз дзень-другі па тысячы тон зерня будзе ў гэтых хлебаробаў і сёлета.
А першым у гаспадарцы тысячнікам стаў у нядзелю вадзіцель на адвозцы збожжа Віталь Тапуноў. Паводле ўмоў спаборніцтва, дырэктар гаспадаркі ўручыў яму грашовую прэмію.
Ігар АДАМОВІЧ. Фота аўтара
На здымку: камбайнер Генадзь Лухверчык, вадзіцель на адвозцы збожжа Віталь Тапуноў, камбайнер Сяргей Кудлянкоў, памочнік камбайнера Сяргей Шчатко, камбайнер Дзмітрый Шчатко.
Карта сайта