У суботу на стадыёне СДЮШАР перад матчам 11 тура чэмпіянату вобласці па футболу паміж чэрвеньскім «Коласам» і салігорскім «Хімікам-Беларуськаліем» адбылося ўшанаванне ігракоў нашай каманды з нагоды паспяховага выступлення ў Кубку сталічнага рэгіёну.
Старшыня раённага выканаўчага камітэта Андрэй Зубар падзякаваў футбалістам за тое, што годна прадставілі Чэрвеньшчыну ў спаборніцтвах, уручыў ім Ганаровыя граматы і грашовыя прэміі.
Узнагароду атрымлівае нападаючы «Коласа» Аляксандр Мрынскі.
Як паведамляў ужо “Раённы веснік”, пасля фінальнага кубкавага матча, у якім “Колас”, паказаўшы выдатную гульню, разграміў дзяржынскую “Лівадыю-Юні” – 6:1, надарылася прыкрая гісторыя. Кантрольна-дысцыплінарны камітэт Федэрацыі футбола Мінскай вобласці прыняў рашэнне пакараць нашу каманду тэхнічным паражэннем – 0:3 – за ўдзел у гульні незаяўленага іграка. Тым не менш, “Колас” застаўся ў статусе фіналіста і заняў у спаборніцтвах другое месца.
Сам факт таго, што, нягледзячы на непрыемную сітуацыю, было прынята рашэнне ўшанаваць каманду за паспяховае выступленне ў Кубку, сведчыць пра неабыякавае стаўленне кіраўніцтва раёна да развіцця спорту на Чэрвеньшчыне.
Выступаючы на ўрачыстасці, старшыня райвыканкама Андрэй Зубар выказаў захапленне вынікам, які “Колас” паказаў у фінальным матчы. Ён прызнаўся, што любіць футбол, сам змалку гуляў у яго, уважліва сочыць за выступленнямі нашай каманды і разам з усімі шчыра радаваўся перамозе чэрвеньцаў. Што да адабрання Кубка, то, паводле слоў Андрэя Зубара, гэта здарылася з-за нездавальняючай арганізацыйнай працы.
Тэма ідэалогіі спорту і футбола ў тым ліку неаднаразова гучала ў выступленні старшыні райвыканкама. Ён, у прыватнасці, выказаў крытыку на адрас аддзела адукацыі, спорту і турызму за неналежную арганізацыю ўрачыстага мерапрыемства, маючы на ўвазе тое, што яно праходзіла фактычна пры пустых трыбунах.
Акрамя таго, Андрэй Зубар закрануў і актуальную тэму неабходнасці рэканструкцыі стадыёна СДЮШАР.
– Калі я ў дзяцінстве гуляў у футбол, у нас у вёсцы быў такі ж стадыён, – сказаў ён. – Сорамна, што каманда, якая апошнім часам паспяхова выступае на абласных спаборніцтвах, прымае тут сапернікаў. Таму абяцаю, што ў чацвёртым квартале, калі будзе фарміравацца бюджэт раёна на наступны год, мы заплануем сродкі на тое, каб прывесці стадыён у парадак…
Павіншаваць нашу каманду таксама прыехаў старшыня Федэрацыі футбола Мінскай вобласці Алег Чыкун. Ён адзначыў годны ўзровень развіцця футболу на Чэрвеньшчыне і падзякаваў Андрэю Зубару за падтрымку гульні нумар адзін.
Не забыліся на ўрачыстасці і пра балельшчыкаў. Трэнер “Коласа” Сяргей Прыступа ўручыў футбольныя мячы з аўтографамі футбалістаў старэйшаму заўзятару нашай каманды Аляксандру Жуку, якому хутка споўніцца 80 гадоў, і арганізатару фан-сектара чэрвеньцаў на фінальнай кубкавай гульні ў Лагойску Аляксею Лядскаму.
Ігар АДАМОВІЧ. Фота аўтара
Карта сайта