Рознабаковым, рознакаляровым, не падобным да мінулых прайшло свята вёскі Шасціснопы. У прывітальным слове старшыня Смілавіцкага сельсавета Валянціна Півавар адзначыла актыўнасць, фантазію, адказнасць, ініцыятыву жыхароў населенага пункта.
- У склад Смілавіцкага сельскага Савета ўваходзіць 18 сельскіх населеных пунктаў і адзін пасёлак гарадскога тыпу.У Шасціснопах свята вёскі праходзіць кожны год, дзякуючы ініцыятыве, а галоўнае, самастойнай падрыхтоўцы мерапрыемства групе маладых жыхароў Шасцісноп. Прыемна, калі людзі не чакаюць зрухаў да лепшага, а самі наводзяць парадак і ўтульнасць вакол месца, дзе пражываюць. Сёння ў вёсцы зарэгістравана пастаянна пражываючых 223 чалавекі, з іх амаль палова – маладыя людзі ва ўзросце да сарака гадоў з дзецьмі. Актыўна будуюцца новыя дамы. Безумоўна, у вёсцы ёсць будучае.
Пашанцавала вёсцы з дырэктарам сельскага Дома культуры Ігарам Гарашчуком і мастацкім кіраўніком установы Аксанай Маціюнас. Менавіта з імі звязаны ўсе прыдумкі і дзеянні па добраўпарадкаванню парку адпачынку ў Шасціснопах, па арганізацыі свят, конкурсаў, вечароў адпачынку. Разам з аднадумцамі і мясцовымі самадзейнымі артыстамі яны падрыхтавалі цікавае свята “Мой дом – мая вёска”. Болей 25 гандлёвых,забаўляльных кропак працавалі на свяце. Акрамя традыцыйных шашлыкоў і калбасак ад “Турэцкага кумпячка”, салодкай ваты, батута і надзіманых горак, можна было паспаборнічаць у стральбе з вінтоўкі і лука.
Па традыцыі на свяце шмат цёплых слоў сказалі ў адрас доўгажыхароў вёскі, не забылі суседзяў з вёсак Старына і Дукора. Апладысментамі і памятнымі сувенірамі ад сельвыканкама віталі Наталлю Андрэяўну Камейка, Вікенція Леанідавіча Шыліна, Фёдара Архіпавіча Шатэрніка, Веру Ільінічну Бурак. А таксама бацькоў самых маленькіх жыхароў Сцяпана Атрашэвіча, Юліі і Юрыя Андрэйчанка з Шасцісноп, Амеліі Бяляевай са Старына.
І астатняя частка праграмы была прысвечана дзецям – будучаму вёскі. Адзначылі граматамі ўдзельнікаў драматычна-танцавальнага гуртка, падзякавалі бацькам, якія прыводзяць дзяцей за руку на заняткі гуртка, дапамагаюць вырабляць касцюмы, хварэюць за выступленне сваіх дзяцей за кулісамі, спяваюць і танчаць разам з імі. Пад сучасныя рытмы беларускіх патрыятычных песен артыстычна танцавалі дзеці і падлеткі рознага ўзросту, праслаўляючы родную Беларусь. На пляцоўцы гледачоў таксама танцавалі. Відаць было, што робяць яны гэта з задавальненнем і не ўпершыню.
Па-сапраўднаму прафесійнымі былі выступленні гурта народнай песні “Сваякі” Шасціснопскага сельскага Дома культуры, самадзейнай спявачкі Алены Гаранчук, гасцей свята – гурта “Чэрвеньскія балагуры” і жартоўнага гурта “Зажигалки” Драчкаўскага Дома культуры Смалявіцкага раёна.
У сцэнарыі свята быў адзін загадкавы пункт – адкрыццё “Месца шчасця з лавачкай кахання”. Сюрпрызам для гледачоў стаў момант, калі пара маладых людзей, якія толькі ўзялі шлюб, завіталі ў Шасціснопы.Ім даручалі быць першымі адкрывальнікамі памятнага знака. Пад легкай тканінай, якая закрывала “Месца шчасця”, жыхары вёскі ўбачылі прыгожую лавачку, абкружаную аркай у выглядзе сэрца. На гэтую арку маладая сямейная пара павесіла сімвалічны замочак свайго шчасця.
- Са з’яўленнем “Месца шчасця з лавачкай кахання” няхай у нашай вёсцы з’явіцца яшчэ адна добрая традыцыя, каб любячыя пары, якія ўступаюць у шлюб, прыходзілі на гэта месца і астаўлялі замкі альбо чырвоныя ленты, як знак моцных пачуццяў і вернага кахання, - сказаў аднавяскоўцам Ігар Гарашчук.
Жыхары шчыра віталі і віншавалі маладых Антона і Ксенія Разумоўскіх.
Яшчэ адна задумка арганізатараў удалася на славу. На працягу мерапрыемства працавала дабрачынная латэрэя. Гледачы куплялі квіткі, якія разыгралі ў канцы свята. Пашанцавала толькі траім удзельнікам. Яны атрымалі мангал з шампурамі, рашоткі для барбекю і іншыя прыстасаванні. Астатнія грошы пойдуць на добраўпарадкаванне парку адпачынку ў вёсцы Шасціснопы. Прысутныя апладысментамі падтрымалі такую прапанову.
Свята працягвалася да ночы. На усю вёску грымела дыскатэка, але ніхто не абураўся: у вёсцы свята!
Галіна ГАМЕЗА. Фота аўтара
Карта сайта