Сем каманд бралі ўдзел у чэмпіянаце раёна па валейболу, які арганізаваў фізкультурна-спартыўны клуб пры аддзеле адукацыі, спорту і турызму райвыканкама.
Пачаўся ён са спаборніцтваў у групах. У Чэрвені барацьбу за дзве пуцёўкі ў фінальны турнір вялі каманды лясгаса, будаўнічага ліцэя, СШ №4 і сельгасфіліяла “Новыя Зелянькі”. Першае месца занялі валейбалісты чацвёртай школы, другое – спартсмены лясгаса.
У Смілавічах з першага месца выйшла з групы каманда сельгасліцэя, другой стала каманда СШ №1. За бортам фінальнай часткі турніру тут засталіся валейбалісты ААТ “Запольскае”.
Чатыры мацнейшыя каманды прадоўжылі барацьбу за чэмпіёнства ў спартыўным комплексе “Ігумен” Чэрвеньскай СДЮШАР. У першым паўфінале сустрэліся валейбалісты СШ №1 і СШ №4. Чэрвеньцы, прайграючы ў стартавай партыі 12:17, здолелі навязаць сапернікам барацьбу. Яны не толькі параўналі лік, але і ў напружанай канцоўцы вырвалі перамогу – 27:25. А вось дзве наступныя партыі былі за смілаўчанамі – 25:18, 15:4.
Вельмі захапляльнай атрымалася і першая партыя другога паўфінала. Спартсмены лясгаса, знаходзячыся за крок да паражэння ад каманды Смілавіцкага сельгасліцэя – 19:24, правялі пяць запар выніковых розыгрышаў. Пасля нічыёй барацьба пайшла мяч у мяч і скончылася з лікам 31:29 на карысць валейбалістаў лясгаса. На хвалі поспеху яны не пакінулі сапернікам шанцаў у другой партыі – 25:16, заваяваўшы такім чынам пуцёўку ў фінал.
Тры партыі спатрэбілася, каб вызначыць бронзавага прызёра чэмпіянату. Каманда СШ №4 адолела спартсменаў сельгасліцэя – 2:1 (25:16, 25:23, 15:11).
У фінальным матчы валейбалісты лясгаса трымаліся ў першай партыі супраць каманды СШ №1 да ліку 8:3, а потым смілаўчане перахапілі ініцыятыву і перамаглі – 25:17. Другая партыя таксама была за спартсменамі са Смілавічаў – 25:18.
Чэмпіёнамі раёна ў складзе каманды СШ №1 сталі Ігар Шчурко, Павел Ярашэвіч, Канстанцін Груздоў, Мікалай Котчанка, Юлія Раманеня, Максім Ляшук, Ігар Ярута і Алеся Шагун.
Каманды пераможцы і прызёры спаборніцтваў узнагароджаны Граматамі і медалямі. Смілаўчанам таксама ўручаны Ганаровы кубак.
Лепшым іграком турніру прызнаны Павел Ярашэвіч з каманды СШ №1.
Ігар АДАМОВІЧ. Фота аўтара
Карта сайта