Пасля адпачынку ў дзявятым туры чэмпіянатуМінскай вобласці з-за няяўкі на матч у Чэрвень “Фалько” (Дзяржынскі раён) і кубкавай гульні ў Слуцку наша каманда выправілася мінулай нядзеляй у Мар’іну Горку.
На паядынак з мясцовай “Вікторыяй” “Коласу” не ўдалося сабраць традыцыйны стартавы састаў. А галоўнай станоўчай падзеяй дня стаў дэбют у складзе жоўта-чорных Уладзіслава Завадскага. У спісе каманд, за якія выступаў 28-гадовы паў- абаронца – “Гарадзея-2”, “Гарадзея”, “Смалявічы”, “Славія” (Мазыр), “Крумкачы”, “Ашмяны-БГУФК”. Некалькі апошніх сезонаў Уладзіслаў быў адным з вядучых ігракоў каманды “Фалько” (Дзяржынскі раён). У яе складзе ён стаў лепшым бамбардзірам мінулагодняга чэмпіянату Мінскай вобласці, забіўшы 29 мячоў.
Нулі на віртуальным табло ў Мар’інай Горцы (рэальнае чамусьці не працавала) трымаліся да 22-й хвіліны. А потым “Колас” выдаў галявую феерыю, ад якой закружылася галава нават у прыхільнікаў “Вікторыі”. Распачаў яе Дзяніс Сіманчык, патрапіўшы ў “дзявятку” з-за межаў штрафной пляцоўкі. Потым з блізкай адлегласці дакладна прабіў праз сябе Віктар Кліміхін. Наступным вызначыўся Аляксандр Каралёў. Не прайшло і чатырох хвілін, як Дзмітрый Асіпенка прамым ударам з вуглавога прымусіў “Вікторыю” ў чацвёрты раз пачынаць з цэнтра поля, а аднаго з мясцовых заўзятараў усклікнуць: “Які чэмпіянат Еўропы? Прыязджайце ў Мар’іну Горку, паглядзіце, як забівае “Колас”!”
Ад пачатку другога тайма, нарэшце, “прачнулася” “Вікторыя”. Гаспадарам поля, натуральна, не было чаго губляць, акрамя ўласнага гонару. Адпаведна, у чэрвеньцаў з’явілася магчымасць для хуткіх контратак. Адна з іх завяршылася пятым голам у вароты мар’інагорцаў. Дзмітрый Асіпенка зрабіў закід па паветру ў штрафную пляцоўку, дзе мячом завалодаў Уладзіслаў Завадскі і забіў свой першы мяч у складзе “Коласа”.
Далей гульня пайшла на сустрэчных курсах. Падзеі на полі больш нагадвалі перастрэлку, у выніку якой “Вікторыя” забіла тры мячы, а нашы яшчэ два. Вызначыліся Аляксандр Каралёў і Уладзіслаў Завадскі. У абодвух выпадках галявыя перадачы зрабіў галоўны трэнер “Коласа” Дзяніс Трапашка, які выйшаў на замену. 7:3 на карысць нашых у гэтым матчы і 12:4 па суме дзвюх гульняў чэмпіянату, паколькі ў Чэрвені мар’інагорцы былі таксама бітыя – 1:5.
Пасля матча мы пагутарылі з Дзянісам Трапашкам.
– Дзяніс Мікалаевіч, у сённяшняй гульні ўдзельнічалі не ўсе ігракі асноўнага саставу. Ці стала гэта праблемай для трэнерскага штабу?
– Сапраўды, мы недалічыліся некалькіх футбалістаў асновы. Але я не сказаў бы, што гэта стала вялікай праблемай. Калі мы разлічваем вырашаць сур’ёзныя задачы, то не павінны рабіць стаўку толькі на пэўных ігракоў. У нас кожны гатовы выходзіць на матч і змагацца. Адзінае, што давялося крыху паламаць галаву наконт расстаноўкі футбалістаў на полі. Хачу сказаць, што, напрыклад, тыя ж Юрый Весялоў і Павел Лаўрык, якія звычайна маюць менш гульнявога часу, годна сябе паказалі ў сустрэчы з “Вікторыяй”.
– Чым можна растлумачыць тое, што ў другім тайме “Колас” прапусціў тры мячы?
– Цяжка псіхалагічна захоўваць максімальную канцэнтрацыю пры ліку 5:0. Магчыма, дзесьці расслабіліся, падсвядома пачалі эканоміць сілы на наступны кубкавы матч з “Беразіно”. Але ў любым выпадку гэты момант будзе прадметам абмеркавання з камандай, бо прапускаць тры мячы ў гульні гэта зашмат.
– Ці апраўдаў Вашы надзеі дэбютант “Коласа” Уладзіслаў Завадскі?
– Нам быў вельмі патрэбны атакуючы ігрок такога тыпу. У матчы з ”Вікторыяй” Улад парадаваў. Ён не толькі забіў два мячы, але і пастаянна напружваў абарону гаспадароў поля, а пры чацвёртым узяцці варот, калі Дзмітрый Асіпенка забіваў з вуглавога, адцягнуў на сябе ўвагу аднаго з сапернікаў, што і дапамагло дабіцца поспеху. Увогуле ж, ведаючы магчымасці Уладзіслава, перакананы, што ў наступных гульнях ён яшчэ больш раскрыецца ў нашай камандзе.
– Наперадзе ў “Коласа” – напружаны графік: хатняя сустрэча з лідарам групы – стаўбцоўскім “Кронанам”, праз гульню з “Іслаччу” – выезд у Капыль на матч з “Бабоўняй”, потым прымаем дома “Партызан”, а па серадах – яшчэ і матчы Кубка вобласці. Як плануеце размяркоўваць сілы, каб іх хапіла?
– У нас дастаткова кваліфікаваных выканаўцаў. І ўсё гатовыя гуляць, ірвуцца ў бой. Таму ёсць магчымасць вар’іраваць састаў у залежнасці ад задачы на канкрэтны матч. Я маю на ўвазе задачы тактычныя, бо агульная задача, як мы з ігракамі і дамаўляліся ў пачатку сезона, перамагаць у кожнай гульні, будзь гэта чэмпіянат, Кубак або таварыскі матч.
27 або 28 ліпеня “Колас” згуляе ў Чэрвені са стаўбцоўскім “Кронанам”. Дзень і час пачатку матча стануць вядомымі пазней.
Ігар АДАМОВІЧ. Фота аўтара
“Вікторыя” (Мар’іна Горка) – “Колас” (Чэрвень) – 3:7.
14 ліпеня. Мар’іна Горка. Стадыён “Гарадскі”. 40 гледачоў.
“Колас”: Сіліч, Мінко, Асіпенка, Весялоў, Лаўрык, Сацукевіч, Завадскі І. (Шмідаў, 78), Сіманчык (Гавароўскі, 84), Каралёў, Завадскі У., Кліміхін (Трапашка, 71).
Галы ў “Коласа”: Сіманчык (22), Кліміхін (29), Каралёў (31, 74), Асіпенка (35), Завадскі У. (58, 83).
Карта сайта