Выхаванка трэнера Чэрвеньскай ДЮСШ Юрыя Лейкіна Аліна Мажароўская заваявала сярэбраны медаль на адкрытым рэспубліканскім турніры па вольнай барацьбе “STAYKI OPEN-2024”.
У спаборніцтвах удзельнічалі 270 юнакоў і дзяўчат 2007-2008 гадоў нараджэння з Беларусі, Расіі, Казахстана, Кыргызстана і Узбекістана.
Аліна Мажароўская, якая выступала ў вагавой катэгорыі 43 кілаграмы, на шляху да фіналу перамагла равесніц з Расіі, Казахстана, а таксама зямлячку – чэмпіёнку Беларусі. У матчы за першае месца яна ў роўнай барацьбе саступіла расійскай спартсменцы, якая мае тытул чэмпіёнкі Еўропы.
– Аліна паказала прыстойны вынік, – адзначыў у каментарыі “Раённаму весніку” Юрый Лейкін. – Тым больш, што гэты турнір мы разглядалі як этап падрыхтоўкі да чэмпіянату Беларусі сярод кадэтаў, які пройдзе праз тыдзень у Жлобіне. Вось там будзе барацьба за пуцёўку на чэмпіянат Еўропы ў Сербіі. І ў выпадку поспеху Аліне давядзецца сустрэцца з саперніцай, якой саступіла ў фінале “STAYKI OPEN-2024”, ужо на еўрапейскім памосце.
Ігар АДАМОВІЧ
Карта сайта